特朗普目標顯露 ! 市場未穩或有利黃金 !?

美國總統特朗普發動嘅關稅戰，戰火燎原，金融市場股債滙三殺，向來被視為避險資產嘅美債、美元都被殺跌，反映關稅戰動搖市場對美元資產嘅信心！
金融市場中，黃金最硬淨，成為資金避難所。老一輩經歷過打仗嘅，都知道走難有金傍身有幾重要，現時打緊嘅關稅戰，雖然有別於槍彈戰爭，
但黃金都盡顯防衛本色，真金不怕洪爐火，就連有硝煙同無硝煙嘅戰火都不怕！
受關稅戰消息牽引，上周五美股反覆靠穩，道指、標指、納指分別升0.05%、0.74%、1.26%；美債10年期孳息稍跌至4.25厘；美滙指數稍升至99.59；黃金見獲利盤，
現貨金價回吐至每盎司3,336美元（上周二高見3,500美元）。關稅戰似有轉機，但聽特朗普口風，關稅只係手段，非關稅壁壘先係目標 ！
金價突破 成另類經濟衰退指標 :
對於日前連債市都見拋售，資金避險流入金市，據世界黃金協會3月數據，全球三大黃金儲備國依次為：
美國（8,133.5噸）、德國（3,351.5噸）、意大利（2,451.8噸），至於中國（2,284.5噸），則排第六。
金價上年1月仍喺每盎司2,000美元水平徘徊，上年3月突破2,100美元，一路扶搖直上，到上周二突破3,500美元再創新高。關稅戰引發經濟衰退風險，金價突破亦可能預示經濟衰退，
金價曾經出現4次重大突破：1972年2月、1978年8月、2008年2月、2024年3月，前3次隨後出現嘅係：1973年第一次石油危機、1979年第二次石油危機、2008年環球金融危機。
市場點睇後市 :
摩根大通認為，關稅戰繼續推動黃金結構性牛市，預計明年第二季金價突破4,000美元；高盛亦預計明年中見4,000美元。
要注意的是，金價幾時見頂，視乎特朗普政策；而政策風險係，今日嘅特朗普，或被明日嘅特朗普打倒！
筆者:馬田 (分析師) 29-04-2025
#以上僅為筆者個人觀點,並與本公司立場無關.
#策略建議僅供參考，入市有風險，投資需謹慎.